منتدى خرابيش

nader moh

سوق الجمعة.. وين تاركنا ورايح؟!

أنشئ بواسطة nader

أنا خايف.. وقلبي قاعد يدق.. يدق.. يدق من كثر القلق والتّوتر.

هالحالة مستلبستني الله وكيلكو من يوم ما أعلنوا عن نيّة أمانة عمّان تغيير موقع سوق الجمعة من العبدلي لراس العين.

أيّام صعبه جايه علينا يا جماعة الخير. لا والله مش تشاؤم، بس مسموم بدني من وين بدّي أشتري بنطلون بخمس دنانير وبلوزة بثلاث دنانير وكندرة بعشر دنانير؟!!!

إحنا داخلين عالشّتا وبدّي جاكيت، وبنطلونين كوردروي عشان أظل متدفّي بالبردات. وأبو ثلاث بلايز صوف مُعتبر مُقاوم لاختراق الهواء والمطر. وهاظ الحكي كلّه حقّه قروش كثير لو بدّي أطلع أشتريه من واحد من المحلات المنشّيه في واحد من هالمولات، أو حتّى من أي محل خارج المولات.

لاحقين حتّى الفقير المسخّم على رزقته؟! دخيلكو اتركولنا هالسّوق اللي إله خادمنا ثلاثين سنه، وساتر علينا الله يستر عليكو.

0 0

0