منتدى خرابيش

Sarah Shawwa

زي قرصة النحلة

أنشئ بواسطة Sarah

لطالما صفنت في فكرة المقاومة.. هل هي فعلا مجدية؟ أم أنها فقط بتزيد من عدّاد الشهداء، والدمار النفسي و المادي لمن بقى؟
و أنا هنا في عمّان.. بلد الأمان (لحد ما).. أنتظر منقوشة الزعتر لتجهز.. أجلس على كرسي الانتظار في الجو اللطيف النظيف.. أجلس أنظّر على من ضحّى و ما زال يضحي من أجل فلسطيننا جميعا!
و إذ.. بنحلة تأتي من بعيد نحوي.. جعلتني أنتفض من مكاني خوفا منها! و دخلت أنتظر المنقوشة لتجهز داخل المخبز -زي الشاطرة- .. بلا جو لطيف بلا جو نظيف!!
مشكلجية!! أنا قاعدة لا إلي ولا علي!
قعدت جوه أأنب حالي.. كيف يعني أنا خفت منها وهي إشي كتير صغير قدامي!!! و بليحة إيد مني بخلص عليها!
و كمان!!! لو قرصتني حتموت -معلومة علمية-.
و هون ضوت لمبة !!

النحلة ممكن ناس تشوفها انتحارية.. لأنها أولا بتهاجم إشي أقوى منها بكثير. و ثانيا انها لما تقرصه حتموت.. و اللي قرصته.. أسبوع زمن و بطيب..
طب ليش مغلبة حالها؟! متعيش زي هالدبانة كافية خيرها شرها!! مش أحسن!؟
لأ مش أحسن.. يع!!.. مين بده يكون دبانة.. عالرايحة والجاي الناس بتلطش فيه.. وما بتشوفه إلا مفعوص بقتالة هالدبان.. باختصار ملطشة..
أما النحلة! يا سلام عالنحلة.. و حلاوتها!
الفزة اللي خلتني أفزها وأقوم أهرب جوا.. وطريقة تعاملي معاها طول هالسنين بمبدأ : بمشي الحيط الحيط ويا رب ما أنقرص..
هذا هو اللي اسمه التضحية بالنفس لهدف سامي!
هي يمكن تموت إذا قرصتني.. بس حتمشيني عالعجين ما ألخبطوش مع النحلات اللي بقيوا.. وحيضل عندي رهبة منهم كلهم.. و مش حقرب..

وهنا خلصت منقوشتي.. أخذتها وطلعت عالشغل.. طلعت من المخبز بمنقوشة.. و حل لصراع أزلي.. بيني و بين نفسي.

0 0

1