منتدى خرابيش

laila rasheed

بنات العرب.. وشويّة تساؤلات.. وسامحونا

أنشئ بواسطة laila

شو بالضّبط قصّة البنات وعوجة اللسان اللي جملة انجليزي (غالباً كلها خطأ) ونص كلمة عربي قال بتطلع معها ثقيله وبتجاهد عشان تنطقها؟!! يا حبيبتي اللي بسمعك وإنتي بتحكي بقول عنّك جاية حدف من نص لندن على صحارى العربان اللي مش قد المقام!

وشو الوضع بالنّسبة لمشية الدّلال الاستعراضية اللي دابحينّا فيها، حتّى بنص الشّارع والسّيارات طايره، لازم تمشي مخترة دادا دادا وإن فرمتها عشر سيارات ورا بعض؟!! قصدك تقوليلنا إنّو تعالوا شوفوني كيف أنا رشيقة وهيكا؟!!

أمّا بعض الأخوات "المحجّبات" اللي فيهم حاطّة منديل بلفّة أكبر من مجموعة سلسلة جبال كلمنجارو، فهدول نفسي أعرف شو نوع الحشوة اللي تحت المنديل اللي بتخلّي راسك مايل من ثقله؟! وشو بالنّسبة للتنورة أو البنطلون أو البلوزة اللي أصغر بعشر نُمر من مقاسك الأصلي؟!! طيب والله العظيم ما أنا عارفه كيف بتعرف تحشر جسمها جوّاتهم؟!!! يعني أتمنّى وأرجو تحدديلنا موقفك بالضّبط من الحجاب أو عدمه.

وأحلى إشي كم الصّبغة الشّقرا اللي بتخلّيني أحس حالي قاعدة بدولة اسكندنافية، معقول انقرض السّمار والشعر الأسود في الوطن العربي وقريباً الاتحاد الأوروبي رح يضمنا معاه؟!!!

وماذا عن المكياج، وخط الكحلة اللي بنشحط من العين للدينتين، والخدود اللي متفحة من كتر الأحمر اللي عليهم، والحلق اللي أكبر من بُرج إيفل، والرموش الصّناعية اللي برفرفوا متل المراوح، والإكسسوارات اللي بتضوي وتطفي متل شجرة عيد الميلاد؟!!!

وشو قصّة البوتوكس والنفخ والشّفط اللي شغّالين على قدم وساق؟!! يا بنتي مين اللي فهّمك إنّه لمّا عضلات وجهك تتجمّد وتصير متل تمثال الشّمع بتصيري أحلى؟!! صدقيني اللي أقنعوكي بهالحكي ظلموكي وظلمونا معك.

شو الوضع بالضّبط؟!!! بس بتساءل!

4 0

2