منتدى خرابيش

ghada mosa

الكلاسيكو سيّد الموقف

أنشئ بواسطة ghada

معقول جد العرب الأصلي إسباني؟!!!

حالة تأهُّب! حظر تجوّل، الشّوارع فاضية، الكافيهات مليانة عالآخر، والقعدة فيها أصلاً بالحجز. وأحياناً بدّك تدفع بدل الحجز، هاد غير حق فنجان القهوة وراس الأرجيلة وأي طلبات تانيه.

نُص الشّعب لابس تيشيرتات بيضاء، والنّص التاني تيشيرتات خمري مخططة كُحلي أو كُحلي مخططة خمري (مش قادرة أحدّد صراحة).

وقال شو؟ الكُل متأهبين، ومشدودين، وبحالة ترقُّب واستنفار، والعيون ثابتة باتّجاه واحد من غير ولا رمشة، وكُلها مثبّتة على الشاشة اللي قدّامهم!

لدرجة بتخلّيني أتخيّل الكرامة العربية بدت تفور وهينا شوي ورح نقوم قومة رجُل واحد لإنقاذ الأقصى، أو إغاثة سوريا، أو لملمة جراح العراق.

لكن على ما يبدو إنه الأمّة العربيّة الرّياضية اللي ميداليات البطولات العالمية معبية حيطان بيوتها، عم بتمُر حالياً بلحظات أكثر مصيرية من خطر تدمير الأقصى، أو دمار سوريا، أو تفتيت العراق، أو تغيير خارطة المنطقة عن بُكرة أبيها. وعم بتواجه الحرب الأعظم والأكثر مصيرية، اللي إسمها حرب الكلاسيكو.

وبمجرّد ما يصفّر الحكم، بشتغل حالة الهوس بين البرشلونيين والريال مدريديين، وبشتغل معها الصراخ والتّحدي وبتقوم القيامة وبتقول اللهم السلامة. وبالآخر الفريق المُنتصر بعمل مسيرات زمامير تخترق الفضاء، والمهزومين بروحوا يلعقوا جراح الهزيمة، وبشتغل الوعيد والتهديد والشماتة، وبولّع تويتر والفيسبوك، وهات خلّصنا لأسبوع بعد المُباراة.

أجدادنا الإسبان وصلت سيطرتهم على العواطف والعقول مرحلة صار لازم فعلياً ندرسها، أي ما إلكم علي يمين، ما ضل علينا غير نعمل دبكة على أنغام الفلامنكو.

2 0

1