منتدى خرابيش

yousef ali

ألف مبروك.. أخيراً في الأردن ملكة جمال

أنشئ بواسطة yousef
المخربشين Firas Jarrar Màhmöûd Namour محمد عسيله Hamo El Rwesh

أثبتت قصة "ملكة جمال الأردن" إنّا شعب بدنا بس سولافة.

أي نعم.. كل قصة بنعملها فضيحة، وبنقعد نسولف فيها على الفيسبوك وتويتر لنطلّع كل الغل والعصبية والكبت اللي كاتم على أنفاسنا، وبعدها بنروقلنا أكم أسبوع، لتطلعلنا سولافة جديدة نفش غُلنا فيها.

يعني، يمكن إنه اللي شفناها بالصور واليوتيوب مش بالضبط لايق عليها وصف "ملكة جمال" لكن برضه مش لازم نحرق المخلوقة حرق بتعليقاتنا.

ويمكن إنها مبالغة شوي بمكياجها... طيب يا سيدي.. مبالغة شويتين... خلص ولا يهمك مبالغة كثير، لكن برضه مش ضروري نحوّلها لدراكولا.

الحزينة فرحانه بحالها، وفايزه بلقب جمال قد الدنيا، يعني مش سهل هالإنجار، اللي ما بنعرف كيف تحقق ولا بأي مكان ولا أي زمان، بس حتماً هي واللي قرروا إنها أحلى بنت بالأردن عندهم وجهة نظرهم، حرام تظفسوها كل هالطفس!

يعني إذا مش عارفين يطلعلونا نسخة لبنانية من الملكة، بنقدر نقول إنّا ممكن نتفاءل مستقبلا بتطوّر مسابقات الجمال بالأردن ويصير عنّا نسخ من هيفاء وهبي، أو ميريام فارس أو أي مليحة من هالمليحات. ما تيأسوش.. تفاءلوا بالخير تجدوه يا جماعة الخير.

كل الرجاء من الأخوة المجهولين اللي رتّبوا المسابقة اللي ما واحد بالبلد سمع عنها لانتخاب ملكة جمال الأردن، إنهم بالسنوات القادمة يركزوا أكثر بالاختيار، ومش غلط لو أعطوا الشعب فرصة للمشاركة بالتصويت أو إبداء الرأي.

ومبروك على الأردن زينة أو زكية العلمي ملكة جماله الجديدة.

0 4

3