منتدى خرابيش

ghada mosa

آراب آيدول... بين أحلام ووائل ونانسي وحسن

أنشئ بواسطة ghada

راح راغب علامة الله يسهّل عليه، وفقدنا طلته البهيّة اللي كانت بتشرح القلب، وضلّت أحلام قاعدتلنا على كرسي التحكيم في برنامج "آراب آيدول" بتسرح وبتمرح وبتشطح، وبتشوبر بخواتمها وأساورها وسناسيلها الألماس وبتفقع بهالنساوين، اللي أكتر وحده مبخوته فيهم عملت عرس يوم جوزها اشترالها بلاكه بمية ليره.

وعلى شمالها نانسي عجرم بتسبّل بهالعيون الزّرق وبتغري بهالرجال اللي قاعدين بتحسّروا على نصيبهم، وشاطحين بأحلامهم، كيف ممكن الله يرزقهم من وسع وينزّل عليهم الملايين ليتجوز كل واحد فيهم على مرته، نسخه من عينة نانسي اللي كل جمعة بتطلعلهم بالتلفزيون متل اللعبه.

وعلى شمال نانسي قاعد الحليوه وائل ريته يسلملي بهالطّله، والحمدلله اللي سترها معنا بعد ما وقع قلبنا بطلعة راغب. أي والله وما إلكم عليّه يمين، إنّه وهوه بيحكي بهالنعومة واللطافة والنّغاشة، بصير أستحي أحكي عن حالي بنت.

وإلى أقصى اليمين (يمين أحلام!) حاطّين حسن الشّافعي، اللي بذكّرني بإبن الجيران دلّوعة إمّه، بس الشّاب نغش، ليش الحكي، على الأقل مقارنة باللي على شماله (إذا فهمتوا علي!).

0 0

0